Rev 19 | PMA | STEP | Katau en koanik, nalong mari verien tai suval vangi meatin tai koa marite vis marite mok amakul en out nesa avit, “!Masmasien va min Ahi! !Mututien, hetetamenien, ka keihoen vi onen Ahi orer!

Revelation of John 19

Koakeil Ten Out Nesa Amasmas Ahi ven Mahien koa Sani min Taon ten out Babilon

1 Katau en koanik, nalong mari verien tai suval vangi meatin tai koa marite vis marite mok amakul en out nesa avit,

“!Masmasien va min Ahi!
!Mututien, hetetamenien, ka keihoen vi onen Ahi orer!
2 !Hakot keil onen vi anatin ka mal!
Kei san mahien va kat hoeaso
koa mul purun out netan ral min sakien tatisa keil onen.
Ahi sa kes mahien mini
ven kei mu vinvini more eiloheh keil onen.”
3 Keil amakul eris avit,

“!Masmasien va min Ahi!
!Tupas ten ahang koa kan lin mari taon enek ven sakien tatisa keil onen
va nesa lises ka lisenges!”
4 Elda hanumau ka ehat (24) ka tounah ehat (4) koa amoul umot uva netan min Ahi koa rondan en mari vulin ten keihoen onen. Keil aviteni avit,

“!Anatin! !Masmasien va min Ahi!”

Anien Ten Tetaliheien Onen Kei koa Suval Sili Sipsip Tai

5 Evus, nalong rea tai mul selus ka vesesal ven mari vulin ten keihoen onen Ahi koa vit,

“!Kami eiloheh vasi keil koa mimusil kat Ahi orer,
mihemasmasi!
!Kami koa mivouhou veni,
kami koa mimarite vita rokol kami koa mivi havivi,
mihemasmasi!”
6 Evus, nalong mari verien tai suval vangi meatin tai koa marite vis marite mok amakul, amusel keih suval navong mari tahi muti rum en ahat keil. Anatin, verien teni suval voulul koa muroh keih. Nalong keil amakul avit,

“!Masmasien va min Ahi!
Veni Ahi orer, Ahi Asuv ten keihoen,
kei vi Asuv Houlu koa mul losil kat tounah vasi.
7 !Rehesi ir ka rehemakul!
Rehemasmas hetetamenien onen!
Ven avong ten tetaliheien onen kei koa suval sili sipsip emai,
ka ahin onen sak mesen kei veni.
8 Min ahin onen, asan more eisin taoh koa muto ka merendas.”
(Eisin enek vi sakien tetahos onen meatin votut keil onen Ahi.)

9 Evus, angelo viteni minau vit, “Kitis selusien koanik: Tokolkatien onen Ahi hel en koakeil asisil en keil keke uva en anien ten tetaliheien onen kei koa suval sili sipsip.” Ka angelo vit risi minau vit, “Koanik vi selusien anatin onen Ahi.”

10 Navong viteni mukok, namalingling ka numot nuva netan en alen. Ka kei viteni minau vit, “!Konoumontei namukonek! Inau mun navi eiloheh enges onen Ahi suvaluk ka suval tumali keil koa akul anatin en selusien usil Iesu. !Kiha netan min Ahi enges! Veni anatinien usil Iesu vi vatte ten asa koa provet keil vasi ara usili ka en Ninin onen Ahi.”

Meatin Koa Muloh En Hos Taoh Va Vae Mulin Meatin Savsav Keil

11 Evus, nales voiteh ten out nesa seha, ka en out enek, namuti manin nales hos taoh tai. Ka meatin koa mul muloh ien vi Iesu, kei koa avise en 'Meatin ten Anatinien ka Kei koa Aling Desien ien'. Ka en sakien ten maluen, kei mul san hakot min meatin keil, ka mul vae ral min vativieh keil onen. 12 Meten vihil suval ahang, ka vatluvoluv houlu ten hiasuvien amul en vatin. Eis tai, amutisi mul en kei koa kei sasen enges kilea en aneite teni. 13 Ara ka vasin eisin koa musin eni. Ka isen tamun vi 'Vati Selusien onen Ahi.' 14 Meatin keil tavaeen ten out nesa amusili. Keil emun amul amuloh en hos taoh ka amusin en eisin taoh koa muto. 15 Naef takan tai kistal ka en ongon koa hou vasin meatin tatisa keil en kantri keil eni. Kei helosil kat keil hekeih. Heso ruain keil iha en out ten mari vurohien onen Ahi ten Keihoen ven sakien tatisa keil one. Houmoni min keil hesuval navong avita lin site ran hei grep. 16 Eis tai mul en eisin omon ka en horan koa vit, “Asuv Houlu onen asuv houlu savsav keil, ka Avat onen avat savsav keil.”

17 Evus, nales angelo tai mulomal en meteiai. Kei viso keih va min aman vasi keil koa amul amuka en teilang vit, “!Almai, ka mihelah ruai out hetas ven mari anien onen Ahi! 18 !Almai, ka mihean teiai onen asuv houlu keil, onen avat keil tavaeen, onen meatin tavaeen keil one, onen hos keil ka onen meatin keil amuloh eni emun! !Almai, ka mihean teiai onen meatin vasi keil enek: koakeil amaluv vita rokol koakeil avi slev; koakeil amarite vita rokol koakeil avi havipi sukar!”

19 Evus, nales tirendan tisa koa mulamu ka asuv houlu keil ten out netan ral min meatin tavaeen keil one. Keil umai out tas keke avavae vatal Iesu, koa mul muloh en hos, ka meatin keil onen. 20 Kei vuli kat tirendan tisa ral provet taliluvosien onen koa mumon merikel keil en meten tirendan enek keke valuvos koakeil akur metai onen tirendan ka koakeil uva netan min nana onen. Kei son keilu lumoul luva en mari ahang koa suval vuli ahang ten vane. 21 Evus Iesu, koa muloh en hos onen, ra vinvini vasin meatin tavaeen keil onen tirendan ral min naef koa kistal ran ongon. Ka aman keil umai akan vini keil en teiai onen meatin keil enek.